Thursday 11 June 2009

Cur chuige Nashville

Beidh mé ag bualadh bóthair go Baile Átha Cliath ar ball. Thuas ann amárach, beidh mé ag glacadh páirte i gceardlann cumadóireacht amhrán atá á reáchtáil ag IMRO. Tá sé píosa ó ghlac mé páirt i gceann de na ceardlanna seo - cineál cúrsa spioradálta a bheas ann, má bhíonn sé go maith.

Is cuimhin liom blianta ó shin gur ghlac mé féin agus mo leathbhádóir ceoil, John Ryan páirt i seisiún den chineál céanna. Ceann ní ba mhó a bhí i gceist - bhí tríur ríthe tugtha anall ó Nashville ag IMRO lena ngaois a roinnt linn. Nuair a labhair siad ón stáitse, bhí siad lán de chaint bhogfócasáilte Mheiriceá - "you just gotta write from the heart".

Ach ansin, nuair a shuífeá síos leo ag ól caifé, is ag caint ar airgead a bhíodh siad - na deals a dhéanadh Garth Brooks (a bhí ina mheigea-réalta ag an am) le scríbhneoirí eile le hamhráin a chumadh dó a mbeadh a ainm féin luaite leo mar chumadóir - is é siúd a roghnaíodh an téama.

Tar éis lóin, roinneadh ina ngrúpaí muid agus chuaigh na triúr amigo thart ó ghrúpa go grúpa ag cur comhairle orainn. Cuimhním i gcónaí ar chomhairle Wayland Holyfield, a raibh amhrán dá chuid taifeadta ag leithéidí Charley Pride, Reba McIntyre, Tammy Wynette, Kathy Mattea srl, srl. "The thing about country music" a deir Wayland "is that you have to understand the difference between 'simple' and 'stoopid'. You guys understand the difference between 'simple' and 'stoopid'? Bhreathnaigh sé sa tsúil orainn ar fad, ina suí ina gciorcal thart air. "It's about half a million dollars..."

6 comments:

  1. Ní raibh a fhios agam é sin. Nach mé atá 'stoopid'...:)

    ReplyDelete
  2. Beidh mé in Nashville ag tús mí Iúil, le cúnamh Dé. Ní raibh mé ann riamh. Agus tabharfaimid cuairt ar Dollywood, freisin. :-)
    Bhí mé in Pigeon Forge nuair a bhí mé i mo pháiste, ach ní raibh a leithéid ann san aois sin (cé go raibh Dolly féin cáiliúil).

    Anois, an bhfuil sibh ag rá nach bhfuil Achey Breaky Heart stoopid?

    Sainmhíniú ar an gceol tíre: trí chórda agus an fhírinne.

    ReplyDelete
  3. Cad é an difríocht atá idir 'stoopid' agus 'simple' i margadh chomh cúng le margadh na Gaeilge?

    a) €5; b) €500; c) €5,000

    Nó an bhfuil dul amú orm faoin margadh sin i gcomórtas le margadh Neasbhaile?

    ReplyDelete
  4. B an tsuim is gaire do mharc, cheapfainn.

    ReplyDelete